Post Office Scheme : आजच्या घडीला वाढती महागाई, अनिश्चित बाजारपेठ आणि निवृत्तीनंतरच्या खर्चाची चिंता पाहता सुरक्षित गुंतवणूक आणि नियमित उत्पन्न याची गरज अधिकच वाढली आहे. विशेषतः ज्येष्ठ नागरिकांसाठी पैसे सुरक्षित राहावेत आणि दरमहा ठराविक उत्पन्न मिळावं हीच खरी अपेक्षा असते. अशा परिस्थितीत सरकारच्या हमीसह चालणारी पोस्ट ऑफिसची सीनियर सिटीजन सेव्हिंग स्कीम (SCSS) ही योजना पुन्हा एकदा चर्चेत आली आहे आणि अनेकांसाठी आधार ठरत आहे. Post Office Scheme
पोस्ट ऑफिसची ही योजना पूर्णपणे सुरक्षित असून गुंतवलेला पैसा थेट केंद्र सरकारच्या संरक्षणाखाली असतो. त्यामुळे भांडवल बुडण्याचा कोणताही धोका राहत नाही. बँकेच्या एफडीपेक्षा अधिक व्याजदर मिळत असल्याने ग्रामीण आणि मध्यमवर्गीय कुटुंबांमध्ये या योजनेवर मोठा विश्वास ठेवला जातो. सध्या SCSS योजनेवर सुमारे 8.2 टक्के वार्षिक व्याजदर दिला जात असून हा दर ज्येष्ठ नागरिकांसाठी मोठा दिलासा देणारा आहे.
या योजनेचं खास वैशिष्ट्य म्हणजे यात गुंतवणूक करण्यासाठी मोठी रक्कम असायलाच हवी असं नाही. केवळ 1000 रुपयांपासून खाते उघडता येते तर कमाल 30 लाख रुपयांपर्यंत गुंतवणूक करण्याची मुभा आहे. विशेष म्हणजे आयकर कायद्याच्या कलम 80C अंतर्गत 1.5 लाख रुपयांपर्यंत करसवलत देखील मिळते. त्यामुळे सुरक्षित गुंतवणूक हमीदार परतावा आणि करबचत हे तिन्ही फायदे एकाच योजनेत मिळतात.
ही योजना कोण उघडू शकतो याबाबतही स्पष्ट नियम आहेत. 60 वर्षे किंवा त्याहून अधिक वयाचे नागरिक थेट खाते उघडू शकतात. पती-पत्नी संयुक्त खाते उघडू शकतात. VRS घेतलेल्या कर्मचाऱ्यांना 55 वर्षांनंतर या योजनेत गुंतवणुकीची परवानगी आहे, तर संरक्षण दलातील कर्मचाऱ्यांना 50 वर्षांनंतर ही सुविधा उपलब्ध आहे. त्यामुळे विविध घटकांतील निवृत्त कर्मचाऱ्यांसाठी ही योजना उपयुक्त ठरत आहे.
SCSS योजनेचा मॅच्युरिटी कालावधी 5 वर्षांचा आहे. या कालावधीत मिळणारे व्याज दर तीन महिन्यांनी थेट खात्यात जमा केले जाते त्यामुळे नियमित उत्पन्नाची सोय होते. काही कारणास्तव खाते मुदतपूर्तीपूर्वी बंद केल्यास ठराविक दंड लागू शकतो. तसेच खातेदाराचा मृत्यू झाल्यास संपूर्ण रक्कम नॉमिनीला दिली जाते, त्यामुळे कुटुंबाच्या आर्थिक सुरक्षेचीही काळजी घेतली जाते.
सर्वात महत्त्वाचा प्रश्न म्हणजे दरमहा 17 हजारांहून अधिक उत्पन्न कसं मिळतं? जर एखाद्या गुंतवणूकदाराने या योजनेत 25 लाख रुपये गुंतवले आणि त्यावर 8.2 टक्के व्याजदर मिळाला तर वर्षाला सुमारे 2 लाख 5 हजार रुपये व्याज मिळते. हेच व्याज तिमाही पद्धतीने दिलं जात असल्याने दर तीन महिन्याला 51,250 रुपये, म्हणजेच दरमहा सरासरी 17 हजार रुपयांपेक्षा जास्त उत्पन्न सहज मिळू शकतं.
एकूणच कोणतीही जोखीम न घेता निवृत्तीनंतर नियमित उत्पन्न हवं असेल तर पोस्ट ऑफिसची सीनियर सिटीजन सेव्हिंग स्कीम ही योजना ज्येष्ठ नागरिकांसाठी आर्थिक आधार बनू शकते. सुरक्षितता स्थिर परतावा आणि मानसिक समाधान या तिन्ही गोष्टी शोधणाऱ्यांसाठी ही योजना आजही तितकीच विश्वासार्ह ठरत आहे.