LPG Gas Cylinder Price: आज १ फेब्रुवारी रोजी देशाचा सर्वात महत्त्वाचा आर्थिक बचट म्हणजेच केंद्रीय अर्थसंकल्प संसदेत सादर होत आहे. संपूर्ण देशाचं लक्ष अर्थसंकल्पाकडे लागलेलं असतानाच, सर्वसामान्य नागरिकांसाठी आणि विशेषतः व्यावसायिकांसाठी एक महत्त्वाची आणि चिंतेची बातमी समोर आली आहे. एलपीजी गॅस सिलेंडरच्या किंमतीत पुन्हा एकदा वाढ करण्यात आली असून, या निर्णयाचा थेट परिणाम हॉटेल व्यवसाय, खानावळी आणि खाद्यपदार्थ विक्रेत्यांवर होणार आहे.
दर महिन्याच्या पहिल्या तारखेला एलपीजी गॅसच्या दरांचा आढावा घेतला जातो आणि त्यानुसार नवीन किंमती जाहीर केल्या जातात. आज १ फेब्रुवारीपासून लागू झालेल्या नव्या दरांनुसार १९ किलो वजनाच्या कमर्शियल म्हणजेच व्यावसायिक वापराच्या एलपीजी गॅस सिलेंडरच्या किंमती वाढवण्यात आल्या आहेत. ही दरवाढ सरकारी तेल विपणन कंपन्यांकडून करण्यात आली असून, जानेवारी महिन्यात झालेल्या वाढीनंतर पुन्हा एकदा दर वाढल्याने महागाईचा भार वाढताना दिसत आहे.
मिळालेल्या माहितीनुसार, १९ किलो वजनाच्या एलपीजी गॅस सिलेंडरच्या किंमतीत तब्बल ४९ रुपयांची वाढ करण्यात आली आहे. याआधी जानेवारी महिन्यातच १११ रुपयांची मोठी दरवाढ करण्यात आली होती. सलग दुसऱ्या महिन्यात झालेल्या या दरवाढीमुळे लघु-मध्यम व्यावसायिकांमध्ये अस्वस्थता पसरली आहे. हॉटेल, ढाबे, बेकरी, चहाच्या टपऱ्या तसेच कॅटरिंग व्यवसायावर याचा थेट परिणाम होण्याची शक्यता आहे.
आजच्या नव्या दरांनुसार मुंबईत १९ किलो वजनाच्या एलपीजी गॅस सिलेंडरची किंमत १६९२ रुपये झाली आहे. याआधी ही किंमत १६४२ रुपये होती. तर कोलकाता शहरात याच सिलेंडरसाठी १८४४.५० रुपये मोजावे लागणार आहेत. गेल्या दोन महिन्यांपासून सातत्याने वाढत असलेल्या किंमतींमुळे खाद्यपदार्थांचे दर वाढण्याचीही शक्यता वर्तवली जात आहे, ज्याचा परिणाम अखेरीस सर्वसामान्य ग्राहकांवर होऊ शकतो.
दरम्यान, या दरवाढीचा घरगुती एलपीजी गॅस सिलेंडरवर कोणताही परिणाम झालेला नाही. घरगुती गॅसच्या किंमती सध्या स्थिर ठेवण्यात आल्याने गृहिणींना दिलासा मिळाला आहे. मात्र, व्यावसायिक गॅस महाग झाल्यामुळे छोट्या व्यावसायिकांवर आर्थिक दबाव वाढत असून, अर्थसंकल्पातून सरकार महागाईवर काही दिलासा देणार का, याकडे आता सर्वांचं लक्ष लागलं आहे.
अर्थसंकल्पाच्या पार्श्वभूमीवर झालेली ही दरवाढ महागाईचा मुद्दा पुन्हा एकदा चर्चेत आणणारी ठरत असून, येत्या काळात सरकार यावर काय निर्णय घेते, हे पाहणं महत्त्वाचं ठरणार आहे. LPG Gas Cylinder Price