Shaktipeth Highway : राज्यातील सर्वात चर्चेत असलेल्या नागपूर-गोवा शक्तिपीठ महामार्गाबाबत मोठी आणि महत्त्वाची अपडेट समोर आली आहे. अनेक वर्षांपासून प्रतीक्षेत असलेल्या या प्रकल्पाचा मार्गच आता बदलण्यात आला असून, नव्या आराखड्याला राज्य मंत्रिमंडळाने हिरवा कंदील दिला आहे. या बदलामुळे केवळ मार्गच नाही तर प्रकल्पाची लांबी आणि खर्च दोन्ही मोठ्या प्रमाणात वाढले आहेत.
नव्या आराखड्यानुसार या महामार्गाची एकूण लांबी आता सुमारे 856 किमीपर्यंत जाणार आहे. आधीच्या तुलनेत तब्बल 54 किमीची वाढ करण्यात आली आहे. त्याचबरोबर प्रकल्पाचा खर्चही 80 हजार कोटींवरून थेट 1 लाख कोटी रुपयांपर्यंत पोहोचला आहे. 1 एप्रिल रोजी झालेल्या मंत्रिमंडळ बैठकीत या वाढीव खर्चाला मंजुरी देण्यात आली, त्यामुळे आता प्रकल्पाच्या कामाला अधिक गती मिळण्याची शक्यता व्यक्त केली जात आहे.
या बदलामागचं सर्वात मोठं कारण म्हणजे सातारा जिल्ह्याचा नव्याने समावेश. नव्या मार्गानुसार हा महामार्ग साताऱ्यातील गोंदवले आणि शिखर शिंगणापूर या धार्मिक दृष्ट्या महत्त्वाच्या भागातून जाणार आहे. साताऱ्यात जवळपास 40 किमीचा पट्टा या महामार्गात समाविष्ट करण्यात आला आहे. त्यामुळे पश्चिम महाराष्ट्रातील प्रवाशांसाठी हा मार्ग अधिक सोयीस्कर ठरणार आहे.
या बदलाचा थेट फायदा सांगली, सोलापूर आणि कोल्हापूर जिल्ह्यातील नागरिकांना होणार आहे. आतापर्यंत गोव्याला जाण्यासाठी लागणारा वेळ आणि अंतर मोठं होतं, मात्र हा महामार्ग तयार झाल्यानंतर प्रवास अधिक जलद आणि सोपा होईल, अशी अपेक्षा व्यक्त होत आहे. मराठवाडा, विदर्भ आणि पश्चिम महाराष्ट्र यांना थेट कोकणाशी जोडणारा हा महामार्ग भविष्यात आर्थिकदृष्ट्या मोठा गेमचेंजर ठरू शकतो.
हा महामार्ग केवळ वाहतुकीपुरता मर्यादित राहणार नाही, तर धार्मिक पर्यटनालाही मोठी चालना देणार आहे. पंढरपूरचे विठ्ठल-रुक्मिणी मंदिर, कोल्हापूरचे अंबाबाई मंदिर यांसारखी तब्बल 21 महत्त्वाची धार्मिक स्थळे या महामार्गामुळे एकमेकांशी जोडली जाणार आहेत. त्यामुळे भाविकांना एकाच मार्गावर अनेक तीर्थक्षेत्रांना भेट देणे अधिक सोपे होणार आहे.
नव्या आराखड्यानुसार हा महामार्ग वर्धा, यवतमाळ, नांदेड, हिंगोली, परभणी, बीड, लातूर, धाराशिव, सोलापूर, सातारा, सांगली, कोल्हापूर आणि सिंधुदुर्ग अशा एकूण 13 जिल्ह्यांतून जाणार आहे. त्यामुळे राज्यातील विविध भागांचा विकास एकाच वेळी होण्याची शक्यता निर्माण झाली आहे. Shaktipeth Highway
एकूणच पाहता, शक्तिपीठ महामार्गाचा हा बदललेला आराखडा केवळ रस्त्याचा प्रकल्प नसून, महाराष्ट्राच्या विकासाचा नवा मार्ग ठरणार आहे. प्रवास सुलभ होईल, व्यापाराला चालना मिळेल आणि धार्मिक पर्यटनालाही नवा वेग मिळेल. अशीच आशा आता राज्यातील नागरिकांच्या मनात निर्माण झाली आहे.