Rain Alert: राज्यात पुन्हा एकदा अवकाळी पावसाने थैमान घातले असून गारपिटीच्या संकटामुळे शेतकरी अक्षरशः हवालदिल झाले आहेत. हवामानातील अचानक झालेल्या बदलामुळे मध्य महाराष्ट्र आणि मराठवाडा या भागांमध्ये परिस्थिती अधिकच गंभीर बनली आहे. आकाशात दाटलेले काळे ढग, विजांचा कडकडाट आणि वेगाने वाहणारे वारे यामुळे पुढील २४ तास अत्यंत धोकादायक ठरण्याचा इशारा देण्यात आला आहे.
भारतीय हवामान विभागाने नाशिक, अहिल्यानगर, जळगाव, बीड, छत्रपती संभाजीनगर, जालना आणि परभणी या सात जिल्ह्यांसाठी ऑरेंज अलर्ट जारी केला आहे. या भागांमध्ये वादळी वाऱ्यासह जोरदार पाऊस आणि गारपीट होण्याची शक्यता वर्तवण्यात आली आहे. वाऱ्याचा वेग ताशी ४० ते ५० किलोमीटरपर्यंत जाऊ शकतो, त्यामुळे झाडे उन्मळून पडणे, वीजपुरवठा खंडित होणे आणि शेतीचे मोठे नुकसान होण्याची भीती व्यक्त केली जात आहे.
कालही राज्यातील अनेक भागांमध्ये अवकाळी पावसाने जोरदार हजेरी लावली. छत्रपती संभाजीनगर जिल्ह्यातील सिल्लोड तालुक्यात गारपिटीमुळे रब्बी पिकांना मोठा फटका बसला आहे. गहू, ज्वारी आणि बाजरीसारख्या पिकांसोबतच फळबागांनाही मोठे नुकसान झाले आहे. अचानक आलेल्या या संकटामुळे शेतकऱ्यांचे आर्थिक गणित पूर्णपणे कोलमडले आहे.
सोलापूर आणि सांगली जिल्ह्यांच्या सीमावर्ती भागातही गारपिटीचा प्रचंड मारा झाला. सांगोला तालुक्यातील जुनोनी परिसरात तब्बल दीड तास गारांचा पाऊस कोसळत राहिला. या गारपिटीमुळे डाळिंबाच्या बागांचे मोठ्या प्रमाणात नुकसान झाले आहे. सांगली जिल्ह्यातील जत तालुक्यातील डफळापूर येथेही सायंकाळच्या सुमारास अचानक वातावरण बदलले आणि गारांसह पावसाने जोरदार हजेरी लावली.
या अवकाळी पावसाचा सर्वाधिक फटका फळबागांना बसत असून द्राक्ष, आंबा आणि डाळिंब उत्पादक शेतकरी मोठ्या संकटात सापडले आहेत. आधीच उत्पादन खर्च वाढलेला असताना आता निसर्गाच्या या लहरीपणामुळे शेतकऱ्यांच्या हातात आलेले पीकही धोक्यात आले आहे. अनेक ठिकाणी पिके अक्षरशः जमीनदोस्त झाली आहेत. Rain Alert
हवामान खात्याच्या अंदाजानुसार पुढील काही दिवस राज्यात अशीच ढगाळ परिस्थिती कायम राहणार असून काही भागात पुन्हा गारपिटीची शक्यता आहे. त्यामुळे शेतकऱ्यांनी सतर्क राहण्याचे आवाहन करण्यात आले आहे. गरज नसल्यास घराबाहेर न पडण्याचा सल्लाही नागरिकांना देण्यात आला आहे.
निसर्गाच्या या अवकाळी प्रहाराने पुन्हा एकदा शेतकऱ्यांच्या डोळ्यात पाणी आणले आहे. वर्षभर कष्ट करून उभे केलेले पीक काही मिनिटांत नष्ट होत असल्याचे दु:ख शब्दात मांडणे कठीण आहे. आता सर्वांची नजर शासनाच्या मदतीकडे लागली असून लवकरात लवकर पंचनामे करून नुकसानभरपाई मिळावी, अशी अपेक्षा शेतकरी व्यक्त करत आहेत.
2 thoughts on “गारपिटीचा कहर! या 7 जिल्ह्यांमध्ये हाय अलर्ट; पुढील 24 तास शेतकऱ्यांसाठी महत्त्वाचे”