Loan Waiver Maharashtra | राज्यातील शेतकऱ्यांसाठी एक अत्यंत आनंदाची बातमी समोर आली आहे. गेल्या अनेक वर्षांपासून ‘छत्रपती शिवाजी महाराज शेतकरी सन्मान योजने’च्या कर्जमाफीपासून वंचित असलेल्या ६ लाखांहून अधिक शेतकऱ्यांपैकी ७० हजार लाभार्थ्यांचा मार्ग आता मोकळा झाला आहे. २०२५ च्या अधिवेशनात सरकारने मंजूर केलेले ५०० कोटी रुपये आता प्रत्यक्ष वितरणासाठी सज्ज झाले असून, यामुळे अडचणीत असलेल्या बळीराजाला मोठा दिलासा मिळणार आहे.
८ जिल्हा बँकांना निधीचे वाटप
राज्यमंत्री पंकज भोयर यांनी दिलेल्या माहितीनुसार, राज्यातील ८ जिल्हा मध्यवर्ती सहकारी बँकांमधील ७० हजार शेतकऱ्यांचे पैसे तांत्रिक कारणांमुळे रखडले होते. आता या बँकांना पैसे देण्यासाठी सरकारने प्रशासकीय मान्यता दिली आहे. यामध्ये प्रामुख्याने विदर्भातील नागपूर, वर्धा आणि बुलढाणा जिल्हा मध्यवर्ती बँकांचा समावेश आहे. मुख्यमंत्री देवेंद्र फडणवीस यांच्या नेतृत्वाखालील सरकारने हा रखडलेला प्रश्न मार्गी लावल्याने शेतकरी वर्गात समाधानाचे वातावरण आहे.
कोणाला मिळणार किती लाभ?
या योजनेअंतर्गत सरकारने दोन महत्त्वाचे निर्णय घेतले आहेत:
१. थकबाकीदार शेतकरी: अडचणीत असलेल्या आणि कर्जाचा हप्ता भरू न शकलेल्या शेतकऱ्यांना २ लाख रुपयांपर्यंतची सरसकट कर्जमाफी दिली जाणार आहे.
२. नियमित कर्जदार: ज्या शेतकऱ्यांनी बँकेचे कर्ज वेळेवर आणि प्रामाणिकपणे फेडले आहे, त्यांना प्रोत्साहन म्हणून ५० हजार रुपयांचा निधी दिला जाणार आहे.
प्रलंबित प्रश्न आता सुटणार!
२०१७ मध्ये सुरू झालेल्या या योजनेतून अनेक शेतकरी तांत्रिक अडचणींमुळे वंचित राहिले होते. ८ जिल्हा बँकांचे हे पैसे रखडल्यामुळे शेतकरी नवीन कर्जासाठी पात्र ठरत नव्हते. आता ५०० कोटी रुपयांचा निधी उपलब्ध झाल्यामुळे या ७० हजार खातेदारांना तातडीने कर्जमाफीची रक्कम वितरित केली जाईल. यामुळे आगामी खरिपाच्या हंगामापूर्वी शेतकऱ्यांच्या हाताला आर्थिक बळ मिळणार आहे.