April 6 Weather Forecast |राज्यात गेल्या चार-पाच दिवसांपासून जे चित्र दिसतंय, ते एप्रिल महिन्यातलं वाटतच नाही जणू काही जुलै-ऑगस्टचा पावसाळाच सुरु आहे. सकाळी उन्हं, दुपारी ढग, आणि संध्याकाळी अचानक काळोख त्यानंतर वादळ, विजांचा कडकडाट आणि मुसळधार पाऊस. या सगळ्या परिस्थितीत शेतकरी अक्षरशः हवालदिल झालेला दिसतोय. आणि आता हवामान खात्याचा नवा अंदाज पाहिला तर 6 एप्रिललाही हीच परिस्थिती कायम राहणार असल्याचं स्पष्ट झालंय.
सोमवारी म्हणजेच 6 एप्रिलला मराठवाडा, विदर्भ आणि काही मध्य महाराष्ट्राच्या भागात पुन्हा एकदा वादळी पाऊस, विजांचा कडकडाट आणि 30 ते 40 किमी वेगाने वारे वाहणार असल्याचा इशारा देण्यात आलाय. काही ठिकाणी हलका तर काही ठिकाणी मध्यम स्वरूपाचा पाऊस पडेल, पण त्यात धोका आहे तो वीजांचा आणि वादळाचा. कारण या अवकाळी पावसात विजा कोसळण्याचं प्रमाण जास्त असतं, आणि त्यातच शेतीत काम करणारा बळीराजा अडकतो. April 6 Weather Forecast
सध्या गावोगावी एकच चर्चा ऐकायला मिळते आता काढणी करायची कशी? कारण गहू, हरभरा, कांदा, भाजीपाला ही सगळी पिकं काढणीच्या टप्प्यावर आहेत. कुठे गहू कापून ठेवलेला आहे, कुठे कांद्याचे ढिगारे बाहेर पडलेत आणि अशात जर पाऊस आला तर पूर्ण मेहनत पाण्यात जाते. काही शेतकऱ्यांनी तर कालच घाईघाईत गहू काढून घरी नेला, पण ज्यांना वेळ मिळाला नाही, त्यांची चिंता अजून वाढली आहे.
मराठवाड्यातील लातूर, बीड, परभणी, नांदेड या भागात आधीच गारपिटीने नुकसान झालंय. काही ठिकाणी ज्वारी आडवी झाली, तर काही ठिकाणी द्राक्ष बागांना मोठा फटका बसला. आता पुन्हा पावसाचा इशारा मिळाल्यामुळे शेतकरी म्हणतोय आता अजून किती सहन करायचं?
हे पण वाचा : गारपीट आणि अवकाळी पाऊस या परिस्थितीमध्ये गुरांची या पद्धतीने काळजी घ्या?
विदर्भातही परिस्थिती फार वेगळी नाही. नागपूर, चंद्रपूर, गोंदिया या भागात ढगाळ वातावरण तयार झालंय. दुपारनंतर वारा वाढतो, आणि अचानक पाऊस येतो. त्यामुळे काढणीचं काम अडतंय. शिवाय, वादळामुळे झाडं कोसळण्याचे प्रकारही वाढलेत.
कोकण आणि मुंबई भागात मात्र वेगळंच चित्र आहे. तिथे उष्णता आणि आर्द्रता वाढली आहे. ढगाळ वातावरणामुळे उकाडा वाढतोय. लोक म्हणतात, पाऊस नाही, पण दमछाक होतेय. हवामान खात्याने सांगितलं की, पुढचे काही दिवस तापमान फारसं बदलणार नाही, पण 2-3 अंशांनी हळूहळू वाढ होईल.
पण खरी चिंता आहे ती शेतकऱ्यांची कारण हा पाऊस फक्त भिजवत नाही, तर तोडतोय. गारपीट झाली तर फळबागा संपतात, वादळ आलं तर पिकं आडवी होतात, आणि पाऊस आला तर साठवलेला माल खराब होतो. म्हणूनच आता तज्ज्ञ सांगतायत जेवढं शक्य आहे तेवढं पीक लवकर काढून घ्या. काढलेला माल मळणीला वेळ नसेल तर ताडपत्रीने झाकून ठेवा. कांदा असेल तर त्याला पाण्यापासून वाचवा. फळबागांमध्ये जाळी वापरा, काठ्या लावा.
जनावरांचीही तितकीच काळजी घ्यावी लागणार आहे. कारण वीजा आणि वादळाच्या वेळी मोकळ्या शेतात जनावरं ठेवणं धोकादायक ठरतं. त्यामुळे त्यांना सुरक्षित गोठ्यात ठेवणं गरजेचं आहे.
सध्या परिस्थिती अशी झाली आहे की, शेतकरी रोज आकाशाकडे पाहतोय ढग पाहून मन धडधडतंय. आज पाऊस येईल का? हा प्रश्न त्याला सतावत आहे. कारण एक पाऊस म्हणजे हजारोंचं नुकसान.हवामान खात्याच्या अंदाजानुसार 6 एप्रिलनंतर काही भागात पाऊस कमी होण्याची शक्यता आहे, पण पूर्णपणे हवामान स्थिर होण्यासाठी अजून काही दिवस लागू शकतात. त्यामुळे पुढील 2-3 दिवस अतिशय महत्त्वाचे आहेत.
एकंदरीत, सध्या राज्यातलं हवामान पूर्णपणे अस्थिर झालंय. एप्रिलमध्ये पावसाचा हा तडाखा पाहून अनुभवी शेतकरीसुद्धा म्हणतोय असं कधी पाहिलं नव्हतं आणि म्हणूनच आता प्रत्येकाने सतर्क राहणं, हवामानाचा अंदाज पाहणं आणि वेळेवर निर्णय घेणं खूप गरजेचं झालंय कारण निसर्गाचा हा खेळ अजून थांबलेला नाही.
हे पण वाचा : महाराष्ट्रात पुन्हा एकदा जोरदार गारपीट होणार, हवामान विभागाचा या भागांना मोठा इशारा