Agriculture News : राज्यात पाण्याचा प्रश्न वर्षानुवर्षं कायम आहे… पावसावर अवलंबून शेती करणारा शेतकरी कधी दुष्काळाने तर कधी अवकाळीने त्रस्त होतो. अशा परिस्थितीत “पाणी साठवणूक आणि योग्य वापर” हा एकमेव उपाय मानला जातो. आणि याच पार्श्वभूमीवर आता राज्य सरकारकडून शेतकऱ्यांसाठी एक महत्त्वाचा निर्णय घेण्यात आला आहे. Agriculture News
मुख्यमंत्री शाश्वत कृषि सिंचन योजनेअंतर्गत शेततळे आणि सूक्ष्म सिंचनासाठी कोटींचा निधी मंजूर करण्यात आला असून, यामुळे अनेक शेतकऱ्यांना मोठा दिलासा मिळणार आहे.
सरकारच्या निर्णयानुसार या योजनेत वैयक्तिक शेततळ्यासाठी १५ कोटी रुपयांचा निधी मंजूर करण्यात आला होता. मात्र त्यापैकी ५ कोटी रुपये सूक्ष्म सिंचन (ड्रिप, स्प्रिंकलर) या घटकासाठी वळवण्याचा निर्णय घेण्यात आला आहे. म्हणजेच आता शेततळ्यासोबतच पाण्याचा योग्य वापर करण्यासाठीही भर दिला जाणार आहे.
खरं पाहिलं तर आजच्या परिस्थितीत फक्त पाणी साठवणूक करून उपयोग नाही… ते पाणी योग्य पद्धतीने पिकांना पोहोचणंही तितकंच महत्त्वाचं आहे. म्हणूनच सूक्ष्म सिंचन योजनेला अधिक बळ देण्यासाठी हा निर्णय घेतल्याचं सांगितलं जात आहे.
शेततळे म्हणजे शेतकऱ्यांसाठी पाण्याचा छोटा साठा… पावसाळ्यात पाणी साठवलं की उन्हाळ्यात त्याचा उपयोग होतो. पण अनेक वेळा पाणी असलं तरी ते वाया जातं. अशा वेळी ड्रिप आणि स्प्रिंकलर सारख्या तंत्रज्ञानामुळे कमी पाण्यात जास्त उत्पादन घेता येतं. त्यामुळे हा निधी शेतकऱ्यांच्या भविष्यासाठी महत्वाचा मानला जात आहे.
या योजनेचा लाभ घेणाऱ्या शेतकऱ्यांना अनुदान थेट त्यांच्या बँक खात्यात जमा केलं जाणार आहे. यासाठी महा-डीबीटी प्रणालीचा वापर केला जाणार असून, आधार लिंक असलेल्या खात्यात पैसे जमा होतील. त्यामुळे मधले अडथळे कमी होतील आणि शेतकऱ्यांना थेट फायदा मिळेल.
गावात अनेकदा असं दिसतं की काही शेतकऱ्यांकडे शेततळं आहे, पण पाण्याचा योग्य वापर नसल्यामुळे फायदा मर्यादित राहतो. तर काहींकडे पाणीच नसल्यामुळे पिकं वाळतात. आता या निर्णयामुळे दोन्ही गोष्टींवर एकत्र काम होणार आहे पाणी साठवणूक आणि पाणी व्यवस्थापन.
यामुळे भविष्यात शेतकऱ्यांचा खर्च कमी होईल, उत्पादन वाढेल आणि शेती अधिक टिकाऊ बनेल अशी अपेक्षा आहे. विशेषतः दुष्काळी भागातील शेतकऱ्यांसाठी हा निर्णय खूप महत्वाचा ठरणार आहे.
एकूणच, सरकारचा हा निर्णय कागदावर न राहता प्रत्यक्षात शेतकऱ्यांपर्यंत पोहोचणं गरजेचं आहे. कारण योजना कितीही मोठी असली तरी तिचा फायदा शेवटच्या शेतकऱ्याला झाला तरच ती खरी यशस्वी ठरते.
आता बघायचं एवढंच… हा निधी किती वेगाने आणि किती प्रामाणिकपणे शेतकऱ्यांपर्यंत पोहोचतो… कारण शेवटी बळीराजाला हवी आहे ती फक्त एक गोष्ट पाण्याची खात्री आणि उत्पादनाची हमी…
हे पण वाचा : उन्हाळ्यात कोणते पीक घ्यावे? कमी पाण्यात, जास्त उत्पन्न देणाऱ्या पिकांची खरी माहिती