महाराष्ट्र हवामान अंदाज | महाराष्ट्रात गेल्या काही दिवसांपासून उन्हाने अक्षरशः हैराण केले असताना आता हवामानाने अचानक पलटी मारली आहे. एकीकडे काही जिल्ह्यांमध्ये तापमान ४० अंशांच्या आसपास पोहोचले असताना दुसरीकडे ढग दाटू लागले असून वादळी वारे, विजांचा कडकडाट आणि अवकाळी पावसाचा धोका निर्माण झाला आहे. त्यामुळे राज्यातील अनेक भागांवर अस्मानी संकटाचे सावट दिसू लागले आहे. हवामान विभागाने आज १४ मार्च रोजी राज्यातील ११ जिल्ह्यांसाठी यलो अलर्ट जारी केला असून काही ठिकाणी वादळी वाऱ्यांसह पाऊस पडण्याची शक्यता व्यक्त केली आहे. त्यामुळे शेतकरी आणि नागरिकांनी पुढील काही तास सावध राहण्याचा इशारा देण्यात आला आहे. महाराष्ट्र हवामान अंदाज
कोकण पट्ट्यात मात्र अजूनही उष्णतेचा तडाखा कायम असल्याचे चित्र दिसत आहे. मुंबईसह ठाणे, रायगड आणि पालघर या भागांमध्ये आज उष्ण आणि दमट हवामानाचा इशारा देण्यात आला आहे. सकाळपासूनच वातावरणात उकाडा जाणवत असून दुपारच्या सुमारास उष्णतेची तीव्रता वाढण्याची शक्यता आहे. या भागात तापमान साधारण ३१ ते ३४ अंशांच्या दरम्यान राहू शकते. त्यामुळे बाहेर पडताना नागरिकांनी पाणी पिणे, उन्हापासून बचाव करणे अशा आरोग्याच्या बाबतीत काळजी घेण्याचा सल्ला देण्यात येत आहे.
मध्य महाराष्ट्रात मात्र हवामानात वेगळीच स्थिती पाहायला मिळत आहे. सातारा, सांगली आणि सोलापूर या जिल्ह्यांमध्ये ढगाळ वातावरण तयार होत असून दुपारनंतर वादळी वारे आणि विजांच्या कडकडाटासह हलका ते मध्यम पाऊस पडण्याची शक्यता हवामान तज्ज्ञांनी व्यक्त केली आहे. त्यामुळे या जिल्ह्यांना यलो अलर्ट देण्यात आला आहे. पुणे आणि अहिल्यानगर परिसरातही काही ठिकाणी हलक्या सरी पडण्याची शक्यता आहे. अचानक होणाऱ्या या बदलामुळे शेतकऱ्यांच्या चिंता वाढल्या आहेत, कारण सध्या अनेक ठिकाणी रब्बी पिके काढणीच्या टप्प्यात आहेत.
उत्तर महाराष्ट्रात मात्र सध्या उन्हाचा जोर कायम आहे. नाशिकसह धुळे, नंदुरबार आणि जळगाव जिल्ह्यांमध्ये आज आकाश स्वच्छ राहण्याची शक्यता असली तरी तापमान ३७ ते ४० अंशांच्या दरम्यान राहू शकते. मात्र हवामान तज्ज्ञांच्या मते पुढील २४ तासांत या भागातही हवामान बदलण्याची शक्यता आहे. विशेषतः १५ मार्चच्या सुमारास या जिल्ह्यांमध्ये हलक्या पावसाचा इशारा देण्यात आला आहे. त्यामुळे वातावरणातील उकाडा कमी होण्याची शक्यता आहे.
मराठवाड्यातील परिस्थिती देखील वेगळीच दिसत आहे. छत्रपती संभाजीनगर आणि जालना जिल्ह्यांमध्ये सध्या कोरडे हवामान कायम असले तरी बीड आणि धाराशिव या भागांमध्ये वादळी वाऱ्यांसह पावसाचा अंदाज व्यक्त करण्यात आला आहे. काही ठिकाणी विजांचा कडकडाटही होऊ शकतो. उर्वरित मराठवाड्यात हलक्या सरी पडण्याची शक्यता असून तापमान ३६ ते ३९ अंशांच्या आसपास राहील.
विदर्भात उन्हाचे चटके जाणवत असतानाच आकाशात ढग दाटलेले दिसत आहेत. गडचिरोली, गोंदिया आणि भंडारा या जिल्ह्यांमध्ये आज विजांच्या कडकडाटासह मुसळधार पावसाची शक्यता व्यक्त करण्यात आली आहे. त्यामुळे या भागांना यलो अलर्ट जारी करण्यात आला आहे. नागपूरसह काही जिल्ह्यांमध्ये सध्या मोठा इशारा नसला तरी १५ मार्चपासून संपूर्ण विदर्भात अवकाळी पावसाचा जोर वाढू शकतो, असा अंदाज वर्तवण्यात येत आहे. या भागात तापमान ३८ ते ४१ अंशांच्या दरम्यान राहण्याची शक्यता आहे.
एकूणच पाहता महाराष्ट्रात सध्या उष्णता आणि अवकाळी पावसाचे दुहेरी संकट दिसून येत आहे. काही जिल्ह्यांमध्ये उष्णतेचा तडाखा तर काही ठिकाणी वादळी वारे आणि पावसाचा इशारा असल्याने हवामान पूर्णपणे अस्थिर झाले आहे. त्यामुळे नागरिकांनी आरोग्याची काळजी घेणे आवश्यक आहे. त्याचबरोबर शेतकऱ्यांनी काढणीसाठी आलेली पिके सुरक्षित ठेवण्यासाठी योग्य ती खबरदारी घेणे गरजेचे आहे. कारण पुढील २४ ते ४८ तासांत राज्यातील काही भागांमध्ये अवकाळी पावसाचा प्रभाव आणखी वाढण्याची शक्यता हवामान तज्ज्ञांनी व्यक्त केली आहे.