Ladki Bahin Yojana: राज्यातील लाखो लाडक्या बहिणींसाठी महत्त्वाची बातमी समोर आली आहे. 2026–27 या आर्थिक वर्षासाठीचा अर्थसंकल्प आज विधानसभेत सादर करताना राज्याचे अर्थमंत्री व मुख्यमंत्री देवेंद्र फडणवीस यांनी मुख्यमंत्री माझी लाडकी बहीण योजना सुरूच ठेवण्याचा मोठा निर्णय जाहीर केला आहे. गेल्या काही दिवसांपासून ही योजना बंद होणार का, निधी कमी पडणार का अशा अनेक चर्चा राज्यभर सुरू होत्या. त्यामुळे आजच्या अर्थसंकल्पाकडे विशेषत: महिलांचे लक्ष लागले होते. मात्र मुख्यमंत्र्यांच्या घोषणेमुळे या सर्व शंकांना पूर्णविराम मिळाला आहे.
अर्थसंकल्प मांडताना मुख्यमंत्री देवेंद्र फडणवीस यांनी स्पष्ट शब्दांत सांगितले की, मुख्यमंत्री माझी लाडकी बहीण योजना पुढेही सुरू राहणार असून यासाठी आवश्यक ती भरीव तरतूद करण्यात आली आहे. त्यामुळे या योजनेचा लाभ घेत असलेल्या लाखो महिलांना मोठा दिलासा मिळाला आहे. ग्रामीण भागापासून ते शहरांपर्यंत अनेक कुटुंबांसाठी ही योजना आर्थिक आधार देणारी ठरत आहे.
महायुती सरकारने आपल्या मागील कार्यकाळात सुरू केलेली मुख्यमंत्री माझी लाडकी बहीण योजना खूप कमी कालावधीमध्ये प्रचंड लोकप्रिय ठरली. या योजनेअंतर्गत पात्र महिलांना दरमहा 1500 रुपये थेट त्यांच्या बँक खात्यात दिले जातात. घरखर्च, मुलांचे शिक्षण, औषधोपचार किंवा दैनंदिन गरजांसाठी हा पैसा अनेक महिलांना मोठा आधार देत आहे. विशेषतः ग्रामीण भागात या योजनेमुळे महिलांच्या हातात थोडीफार आर्थिक ताकद आली असल्याचे पहायला मिळाले आहे.
दरम्यान, या योजनेसाठी सरकारला मोठा खर्च करावा लागत असल्याने राज्याच्या तिजोरीवर ताण येत असल्याच्या चर्चा मागील काही महिन्यांपासून सुरू होत्या. काही वेळा हप्ते उशिरा मिळाल्यामुळे महिलांमध्येही संभ्रम निर्माण झाला होता. त्यामुळेच ही योजना पुढे सुरू राहणार की बंद होणार असे अनेक प्रश्न राज्यातील महिलांकडून उपस्थित केले जात होते. मात्र अर्थसंकल्पातील घोषणेमुळे आता हे चित्र स्पष्ट झाले आहे. राज्याच्या मुख्यमंत्र्यांनी याबाबत स्पष्टता देऊन ही योजना अशीच सुरू राहणार असल्याचे सांगितले आहे.
विधानसभा निवडणुकीदरम्यान या योजनेच्या लाभात वाढ करून 2100 रुपयांचा लाभ देऊ असे आश्वासन देण्यात आले होते. मात्र, महिलांना मिळणाऱ्या 1500 रुपयांच्या मासिक लाभामध्ये वाढ करण्याबाबत कोणतीही नवीन घोषणा करण्यात आलेली नाही. त्यामुळे सध्या तरी योजनेचा लाभ पूर्वीप्रमाणेच सुरू राहणार असल्याचे स्पष्ट झाले आहे. भविष्यात परिस्थितीनुसार या योजनेत बदल होऊ शकतात, मात्र सध्यासाठी योजना कायम ठेवण्यावर सरकारने भर दिला आहे.
राज्यातील गोरगरीब महिलांसाठी मुख्यमंत्री माझी लाडकी बहीण योजना सुरू राहणार असल्याची घोषणा दिलासादायक ठरली आहे. महागाईच्या काळात दरमहा मिळणारी ही आर्थिक मदत अनेक घरांसाठी महत्त्वाची ठरत आहे. त्यामुळे आगामी काळातही ही योजना महिलांच्या आर्थिक सक्षमीकरणासाठी महत्त्वाची भूमिका बजावणार, अशी अपेक्षा व्यक्त केली जात आहे. Ladki Bahin Yojana